اشعار خروج کاروان از مکه

بو حسین کیمدی سالوب رعشه دل کفاره
بو حسین کیمدی ویروب تو دهنی اشراره
بو حسین کیمدی وروب درس وفا احراره
بو حسین زینت آغوش خانم زهرادی
بو حسین پادشه لشکر عاشورادی
.
.
بو حسین کیمدی شرف زورقینه لنگردی
بو حسین کیمدی رسولان حقه سروردی
بو حسین کیمدی وفاپیشه لره رهبردی
بو حسین باعث اولوب بیرق ایمان اوجالا
اکبرین ویردی کی اکبر آدی پاینده قالا
.
.
بو حسین کیمدی اولوب دین نبی نخلینه بر
بو حسین کیمدی اولوب شهر عبودیته در
بو حسین کیمدی سوزون آنلامادی ملت شر
بو حسین قانی ،بیلور خلق کی ثارالله دی
رد ایده کیم آقامون منزلتین ابله دی
.
.
بو حسین کیمدی اونون مدحینه عاجزدی قلم
بو حسین کیمدی ویروب سینۀ عشاقه علم

• پنج شنبه
• 24
• بهمن
• 1398
• ساعت
• 08:46
• نوشته شده توسط
• سید محمد حسینی

سکّیز ذیحجّده حجّین حسین
عمریه تبدیل ائلدی ناگهان
امر ائلیوب جان بکف اصحابینه
کرب و بلایه اولالار تز روان

حجّت حق حضرت فرزانه خو
عارف هر مسئله دی موبمو
گوردی حریم حق دادارده
قان توکه ایستور فرق فتنه جو
اسلحه اوستن گینوبلر عبا
شکلده انسان ولی درّنده خو
فعل حرامین قاباقین آلماقا
مکّه نی ترک ائتدی امام زمان

گل دئدی عباسه حسین بی صدا
توطئه وار جوّده ای مه لقا
دوره لیون بیلمیه عورت اوشاق
صبر ائلیون تیره وش اولسون هوا
ظلمت شب قافله دوشسون یولا
مقصدمیز وادی کرب و بلا
بو سوزی رؤیاده دیوبدی منه
جدّیم اوزی خاتم پیغمبران

قویما اوشاقلار بیله بو مطلبی
بیر فقط آگاه ائلیون زینبی
چون او شریک ازلیدور منه
فاطمه سیرینده گزور کوکبی
واردی بیزیم دعوت مخصوصمیز
کعبه دن افضلدی او یر منصبی
مُحرم میقات برازندیوک
عالم معناده رجال و زنان

فاطمه قزلاری هله بی خبر
یورقون آنالار بالالار دیده تر
بعضی دیور عمه ندور بو سفر
عمه دیور مصلحتی حق بلر
مرغ اجل سسلیور ایوای بولار
جمله ئولوم کامینه ایلور سفر
اصغره باخدیقجا دیور جان بالا
سندن آلار زهرلی بیر اوخ توان

گاه رباب اصغره لایلای دیور
گاه گئدور خوابه آنا دینمیور
گاه دیور چیخسا ئیله اصغریم
دیل آچیب هر دم منه مادر دیور
یوخ خبری دهه ی عاشورده
قاندان عبا بو قوزی قربان گیور
تشنه وئرر جان لب نهرینده
فاطمه جنّاتده ایلور فغان

عمّه سی قنداقه باخیب وای دیور
مادری گه وای بالا لای لای دیور
کیم بویادی قانه قماطون اوغول
توکدیگجه گوز یاشی ایوای دیور
من نه امیدیله سنی بسلدیم
حیف امگیم اولدی اوغول زای دیور
کاش او اَجَل تیری دَییدی منه
سن بوی آتیب بیر گون اولیدون جوان

مادر بیچاره سی بیلمز اوزین
فاش ایلینمز بیرینه دیل سوزین
قانلی لباسین چکر آغوشینه
گه بوغازین بوس الیور گه گوزین
باغلی گورر دلبرینون اللرین
شرمدن اخفا ائلیور تز یوزین
اللروی باغلاماسیدیم دییر
قلبیم ایوی اولمازیدی ایندی قان

• دوشنبه
• 4
• مرداد
• 1400
• ساعت
• 15:49
• نوشته شده توسط
• یوسف اکبری

خلیل وارثی تعجیلیله مِنایه یتشدی
حَرَم امیری، حَرَمله حَرَم سرایه یتشدی

امام عصر، بلا نیتیله، باغلادی احرام
ازَل بلا رقمی اهلنه مین آیه یتیشدی

حرم ده اولمادی ممکن مناده کس ماقا قربان
تمام ایلمه میش حَجینی بو آیه یتیشدی

اوخوندی مَکه ده وجهت وجهیه لله
فدالرین گوتوروب دشت کربلایه یتیشدی

منای کرب و بلاده کسیلدی قوچ قوزی قربان
غبار غم ایدوب اوج، عرش کبریایه یتیشدی

بو رَسم شرعیدی قربان کسوب، اوچ حِصه ایده لر
بو رَسم عکس اولوب، اولاد مُصطفایه یتیشدی

حسین جنازه سی دورد حِصه اولدی، قطعه به قطعه
بو محنتون اثری جمله ماسوایه یتیشدی

الین کسن اله، بارماقی بجدل ابن سلیمه
باشین کسن دالیدان، شمر بی حیایه یتیشدی

بیر حِصه قالدی قُوم اوسته، او روح عالمه غالب
او حِصه زینب مظلوم بی نوایه یتیشدی

امان او وقتیدن ایستردی قارداشین تاپا زینب
زِ بس که عِین اَخا ذِکر ایدوب، اَخایه یتیشدی

نه گوردی بیر یارالی پیکری دوشوب یوزی اوسته
نه باشی وار، نه الی، آهی نُه سمایه یتیشدی

آلوب کنارینه عرض ایلدی حسین باجون ئولسون
سنی بو حاله سالوب شمر، مدعایه یتیشدی

آچوب جنازه سی اوسته حجاب ایدوب زلفین
بو نوعیله یارالی پیکری نه سایه یتیشدی

تاپوب او دم باجی قارداش جنازه سین، آنا اوغلین
حیالی تازه گلین نعش کد خدایه یتیشدی

نوایه نی کیمی دلدن گلوبدی پرده به پرده
نواسی اوج ایلیوب، عرشه پایه به پایه یتیشدی

اوزینی سالدی سکینه بابا جنازه سی اوسته
قوجاقلیوب باباسین، چون بالا آتایه یتیشدی

دیمم نجه آیروب شمر او بی کسی آتاسی ندان
غضبلی قمچی النده او بی نوایه یتیشدی

آیردیلار اسرانی جفائیله شهدادن
حسین باشینی ایدوبله جدا، جدایه یتیشدی

ایدوبله ناقه سوار اهلبیتی کرب و بلادن
گیدوبله کوفه ده بیر تازه ماجرایه یتیشدی

بو شرح محنتی گلمز جهاندا شرح و بیانه
یزید مجلس نون ظلمی، انتهایه یتیشدی

حسین دامنینه چنگ وور امیدیله (واقف)
گلوب بو درگهه هر کیمسه مدعایه یتیشدی

• چهارشنبه
• 17
• شهریور
• 1400
• ساعت
• 11:32
• نوشته شده توسط
• یوسف اکبری

دیار کعبه اولا بولمدون مواظب حسینه
زمین کرب و بلا ایلدی تصاحب حسینه

پیمبر اوغلی گلوب نچّه گون سنه قوناق اولدی
گوگل پیاله سی آب ملال و محنته دوندی
خزان گورن گله بنذر سارالدی گل کیمی سؤلدی
آزالدی صبری زِ بس یوز وئروب مصائب حسینه

حقیقی کعبیه عازم اولوب دی باغلادی احرام
یُوبانسا گوردی عدو قتلینه او یرده قوروب دام
بیر عده محرمی گوردی که باغلیوب دولا صمصام
هارا گیدور او جماعت اولوب مراقب حسینه

گوروب مقیم اولا سنده توکر عدو یره قانین
توکولسه قانی گیدر شأن وعزّتی او مکانین
یغوب دی اهل وعیالین گوتوردی پیر و جوانین
خدا یانندا سنون تَرکون اولدی واجب حسینه

موفق اولمادی کوه معناده کسماقا قربان
اوزی کمکلری لازیمدی جان وئره گوروب عطشان
منای عشقه طرف رهسپار اولوب دی شتابان
بولوردی کعبه یازوب کربلانی کاتب حسینه

گُوروب یُوبانماقی جایز دگول قالور گجه چخدی
سفر تدارکی گون دوز گوروب ولی گجه چخدی
او ماه برج وفا چخدی، کیم بولور نجه چخدی
اولوب دی سِیر قَمر تک گجه مناسب حسینه

محمّد حنفیّه اولوب بو أمره خبردار
گلوب حضورینه عرض ائتدی ای شهنشه ابرار
چخوب هارا گئدوسن متّصل گلور بورا زوّار
بیر عده سی اولا بو فکریله مصاحب حسینه

ایشیتدی بو سوزی دولدوردی گوزلرین شه بطحا
اُوز اختیاریمه اولسام بویوردی گیتمرم اصلا
گرک گیدم یولومی کربلاده گوزلوری اعدا
او چولده ال تاپاجاق فرقۀ اَجانب حسینه

بو سوزده آخدی اونون دا عذاره اشک زُلالی
دیدی آپارما حسین لامحاله اهل عیالی
بویوردی قارداش ایدوم قوی سنی بو مطلبه حالی
سنه نهاندی، مُبَرهَندی بو مطالب حسینه

گرک دی منله گیده قیزلاریم بو راهی خطرده
وزیر گور دؤزر آیا قالاندا شاهی خطرده
وزیر جنگ دؤزنمز گوره سپاهی خطرده
اودور که قاراشیم عبّاس اولوب دی طالب حسینه

اوشاق بیوک هامی بو نهضتیم ده شرکتی وار دی
بیوک دی زینبیمون شأنی آیری قسمتی واردی
شریک اَعظم اولوب دور منه لیاقتی وار دی
بو نهضته گوره زینب اولوب دی نایب حسینه

آتام علی اوتوران تختی غَصب ایدوب دی یزید
آدین قویوب دی مسلمان او پست شُوم پَلید
علاوه هر یره بیر نامه گون دروب او عَنید
قویوب دی خارجی آد بُلموسن او کاذب، حسینه

بلایه سالما گلن باشیوى خدا حافظ
عذاره توکمه بو گوز یاشیوی خدا حافظ
یول اوسته ساخلاما قارداشیوی خدا حافظ
خلاصه بُول بو سفردن بیله عواقب حسینه

او کاروان بلا، دیده ده گلاب آپاروب
علی اصغری آغوش ده رباب آپاروب
یانندا نازلی رقیّه یاتوب دی خواب آپاروب
باخور بو منظریه چوخ گلوب دی جالب حسینه

قباق دا قافله نون میر کاروانی گیدور
او شاهه حافظ اولوب اکبر جوانی گیدور
بلی بو علت اولوب دی گجه زمانی گیدور
دولی گوزیله تماشا ائده کواکب حسینه

بیر آیری مَحملین ایچره یاتوب دی بیماری
مریض جسم یله اولموش بلا خریداری
دالی طرفده گلور سر سپاه و سرداری
گجِیدی ظَلمت شب ده اولا مواظب حسینه

چخوب دی چوخ گیجه لر آی گنه نهان اولدی
هلال ماه محرم چخوب عیان اولدی
او کاروانه دیار بلا مکان اولدی
اوزونده کربوبلا گوستروب تناسب حسینه

یواش یواش او مکانه یغشدی لشگر کوفه
خیال ایدولّه سالاق آفتاب دینی کُسوفه
سوئی دوتوب لا غمی الفدن یتشدی الوفه
سوسوزلوقون غمی از بس اولوب دی صائب حسینه

سوسوزلوق آتشی نه چوخ یانوب دی آل عبا
او نچه گونده گیچوب دی یتیشدی عاشورا
حسین قتل ینه اعدا ائدوب دیله شورا
قوروب لا دام بلا مکریله ثعالب حسینه

او گون او چولده مقابل دایان دى نوریله ظلمت
گورن دیردى یقین باشلانوب دی روز قیامت
حسین کومک لرى تا اینکه تاپ دی فیض شهادت
یزید لشگری ظاهرده اولدی غالب حسینه

او کینه جولر او چولده ویروب له ظلمه ادامه
نه نوعیله حرم آهولرین سالوب دولا دامه
یارالی باشلاری لا تحفه گوندروب دیله شامه
گورن جداده دیوب مظهر العجایب حسینه

او کاروان که گیدیردی یول اوسته دیره یتیش دی
یارالى باشی حسینون عجب دی غیره یتیش دی
او یرده راهب اولان شخصه باخ که خیره یتیش دی
اولوب قوناقچی مسلمان یرینه راهب حسینه

موحّد ایلدی نصرانیتی او باش علنی
جمالی نون ایشقی مأت ایدوب گیدوب گلنی
اورکده یازدی آدین (حافظی) اولوب (حسنی)
منم بویورسا بسیم دور جزاده صاحب حسینه

اولار که بزم عزاده همیشه شرکتی وار دور
آناسی فاطمه نون محضرین ده حرمتی وار دور
گوزل مطأعی دی گوز یاشی عالی قیمتی وار دور
سیزیله اوخشیاجاق دی أمام غائب حسینه

حسین آدی لا همیشه من افتخار ایلرم
آدی گلنده دُرِ دیده می نثار ایلم
او شاهه اوخشاماقی روز و شب شعار ایلرم
اولوب دی روحیم ازل گون ده بسکه راغب حسینه

• چهارشنبه
• 17
• شهریور
• 1400
• ساعت
• 11:36
• نوشته شده توسط
• یوسف اکبری

کاروان مکه دن عزتلی بیابانه گلور
آشنادور هامی عشقه دیمه بیگانه گلور
.
پیشوا لشکر عشاقه دیوم کیمدور؟حسین
یارینون محضر پر نورینه جانانه گلور
.
سسلنور کعبه دالیجا دایان ای قبله دل
یانار هجرونده سنون بیت خدا جانه گلور
.
دیور آستاری آپار ویر منیده زینبوه
سالا باشه قاباقا چونکه عزا خانه گلور
.
یوخیدی مروه صفانون دوزومی گئتمه گینه
زمزم معرفتون چشمه سی طوفانه گلور
.
قال دیور منده پیمبر کیمی سن غار حرا
باخمیور سمت جبال عربستان گلور
.
منده قربانلاروی ویر دیور هی کوه منا
عشقیلن فاطمه اطهره ریحانه گلور
.
عرفه گورمز حسینینده دعای عرفات
کوی عشقینده دوتوب داش وراشیطانه گلور
.
کعبه عشقه غرض باغلادی احرام حاجی

• شنبه
• 19
• مرداد
• 1398
• ساعت
• 14:07
• نوشته شده توسط
• ابوالفضل عابدی پور

قطار آل عبا دشت کربلایه گلور
منانی ترک اِیلیوب آیری بیر منایه گلور

اِیدوله طی منازل بیر آیری شوریله
خیال وصل نگاریله چوخ سروریله
عجب صفا تاپاجاخ کربلا، حضوریله
صفا ویره دل عشاق نه سمایه گلور

دِمَم که حجینی ناقص قویوب او شاه اَنام
شروع اِیتمَمیش اعمال حَجی اِیتدی قیام
باتا آخان قانینا کربلا چولونده امام
حجازی ترک ایلیوب دشت نینوایه گلور

نگاری اِیلیر هر یرده یاری، اوز یاری
اودور که یاری اِیدور یاری، یار و انصاری
پوزلمییدی الهی گوروم که پرگاری
او شاه نیت پاکیله کربلایه گلور

باجیسی زینبه وار دلده آیری احساسی
اِیدوبدی محملینه پاسبان، عباسی
الهی ساخلا امانینده اشجع الناسی
او محمل آردیجا یولاردا همچو سایه گلور

چتیندی آیریلاسان بیت حی داوردن
و یا جوار پیمبرده عطر عنبردن
بو نیتیله که آلام بو عطری اکبردن
شتابیله باش آلوب دشت پربلایه گلور

دوشنده یادینه یولاردا جَدی پیغمبر
خطاب ایدور گل اوتور منله روبرو، اکبر
باخیم او گول یوزه زایل اولا اوغول غملر
سَسینی تا آلوری اکبری هرایه گلور

بیله جوانی هزار حیف اولا باتار قانه
آلار کنارینی شاه زمن یانا یانه
گلر فغانه سالار لرزه کون و امکانه
دِیَر آتاندی بیله ناله و بکایه گلور

او چولده اشک حرم سیل تک یوزه آخاجاخ
عروس فاطمه قاندان اَله حنا یاخاجاخ
سَریه قاسمه قان ایچره دیده تر باخاجاخ
هنوز بولمور عزایه و یا حنایه گلور

رباب کام آلوری نازنین نگاریندن
گوتورموری گوزینی دیده خماریندن
اورکی دویموری اول نو گل بهاریندن
نه اِیلسین گوله باخدوقجا دل صفایه گلور

بلا اوخی هله بولمور که قلبینی دَلجاخ
گیدوب مدینه ده اصغر دِیه دِیه اولجاخ
فلک نواسین ایشیدوقجا سَس چکوب گولجاخ
اورکینون غمینی سای گور انتهایه گلور؟

سو اوسته اصغر اَلین بسته طناب ایلر
بو نیسکیلی یادا سالدوخجا پیچ و تاب ایلر
ئولونجه غصّه و غم قلبینی کباب اِیلر
خطور خاطر اولور مرغ دل نوایه گلور

(عتیق) نوحه یاز آغلا، ئولونجه عالمده
نه قدری آغلیاسان وار یری بو ماتمده
جهانی اصغریم آغلاتدی دشت پرغمده
مین اوچ یوز ایلدی که اهل یقین عزایه گلور

• یکشنبه
• 3
• مرداد
• 1400
• ساعت
• 16:32
• نوشته شده توسط
• یوسف اکبری

گل ای سفینهٔ محنتده ناخدا قارداش
گلوب طلاطمه دریا کیمی بلا قارداش

دالونجا قویما علیلم منی گوزی یاشلی
محمد حنفیه سنه فدا قارداش

اگر چه دشمنون آرتوب مدینه دن گئتمه
وطنده واردی گینه قوم و اَقربا قارداش

بیریسی ائتمیه نصرت بیری حمایت ائدر
وجه گلر بئله گونلرده آشنا قارداش

منیم ده قارداشیم عباس تک اُولیدی الیم
گلیدی پنجه مه شمشیر لافتیٰ قارداش

گؤریدیم اوندا یزیدی نئجه مقابل اولور
حلال زاده ایله زادهٔ زِنا قارداش

ائدوم نه چاره گورورسن الیمده قوت یوخ
یوخومدی قوت الیمه آلام جدا قارداش

آتام علی قاباقیندا قلج ویران گونلر
ائدردی صولتیمه فخر مرتضی قارداش

نه نوع گؤر یغیلوب بیر یئره بلا بولودی
دگُل بو کوچ گونی، دوتقوندی چوخ هوا قارداش

گل ایندی گئتمه، کوفه نی ائله موقوف
که اهل کوفه ده یوخ ذره جه وفا قارداش

آتام علینی اولار ئولدوروب گمانیم وار
که قانی ایندیده محرابیده قالا قارداش

یوخوندی چاره اگر گئت آپار جوان لاریوی
حرم آپارماقی وا وئرمرم رضا قارداش

بونی قبول ائلمز غیرت بنی هاشم
که فاطمه قیزی زینب اسیر اولا قارداش

بو خیردا قیزلاری وا رحم ائله مدینه ده قوی
سکینه هاردا گوروب سیلی جفا قارداش

بو قدر بیل، سنی ئولدورسه لر بو قوم شریر
دوشه لّه چوللّره اولاد مصطفیٰ قارداش

بو التماسیمی رد ایلمه دخیلم من
دخیلی تئز ائله بو غصه دن رها قارداش

جواب

مدینه ده بیزه هر چند مهربان چوخ دور
تغافل ایلمه چون جور آسمان چوخ دور

بیری بیریندن آیرماقه صاف معشوقی
بو کارخانه ده معیار امتحان چؤخ دور

گرک بو یولدا ویریلسون مدینه قافله سی
و گرنه شام و عراق اوسته کاروان چوخ دور

حجاز قوش لاری اولسون گرک پراکنده
دیلّه شامی ده ویرانه آشیان چوخ دور

چکوب له اکبریمون صورتین شهادتده
و گر نه صورت اکبرکیمی جوان چوخ دور

پسند ائدوبله علی اصغری شهادت ایچون
دئمه اونون کیمی تیره اولان نشان چؤخ دور

بو آغلاماق سسی کرب و بلاده چوخ اوجالور
که سینه لرده بو گون نالهٔ نهان چوخ دور

بو ذوالجناح منی کربلایه جان آپارور
گئدنده شامه ،سوار اولماقا سنان چوخ دور

دیون کجاوه لری باغلاسونلا وقت گئچر
یئتیشمز آخره قصه بو داستان چوخ دور

واروندی حوصله ایله قفسده ناله دخیل
که تنگه گلسون اگر باغ و بوستان چوخ دور

• یکشنبه
• 31
• مرداد
• 1400
• ساعت
• 11:04
• نوشته شده توسط
• یوسف اکبری

امان اول وقتیدن داد اول زمان دان
حسین کوچ ایلدی دارُالاَمان دان

وجودی امن اولان کون و مکانه
گتورموش دی امان دارالامانه
او بیتُ الاَمنی ده شاهِ زَمانه
اولوب ناامن چیخدی اول مکان دان

گوروب پیغمبر اوغلی فرقهء شام
او یرده قتلی نه ایلوب لر اقدام
بیر آیری حَجّه اوردان دوتدی اِحرام
چکوب ال خانه صاحب خانمان دان

گوروب جُور و جَفا اَهلِ ستم دن
ایدوب هجرت حرم شاهی حرم دن
گرک قان آغلاسون شیعه بو غم دن
که گیزلین چیخدی بلبل گلستان دان

چیخوب بیتِ خدادن حَسرت یله
ایدوب طِیّ مَنازل سرعت یله
یتیشدی مقصدینه حیرت یله
یرین آدین سوروشدی ساربان دان

جواب عرض ایتدی بو یر نی نوا دور
محبّت اهلینه کوی وفا دور
اولان معدن بلایه کربلا دور
بو صحرایه یاغار غم آسمان دان

بویوردی بو بلالی یر منیم دور
حقیقت عالمی نده گلشنیم دور
بو یردن گیچمرم من مدفنیم دور
منیم چون، خلق اولوب خلقت اولاندان

او صحراده سالوب بارِ اقامت
غم اوسته غم یتوب ساعت به ساعت
سویون یولّارینی اهلِ شَقاوت
کسوب قویمازدی گلسون هیچ یاندان

رضای یاره اولدی صرف تسلیم
بلایه ایلدی اکرام و تعظیم
ایدوب معشوقِ حقّ، عشقی تقدیم
چیخوب دلخواهِ جانان امتحان دان

او یرده باشلادی حجّین اساسین
یتوردی باشه سعی یله صفاسین
حضورِ یاریده یتمیش فداسین
گچردوب بیر نچه ساعتده ساندان

پیمبرلر اولوب عشقی نده مبهوت
قالوب صبرینده حیران اهلِ لاهُوت
فدا اولسون او صبر و عشقه ناسوت
گوتوردی پرده اَسرارِ نَهاندان

آدین شیعه قویان لازمیدی هر آن
حسینه آغلاسون ما کان اسکان
حسین امّت یولوندا ای مسلمان
گیچوب اکبر کیمی تازه جواندان

بیله صبر و بیله عشق اولماز آخر
او سلطانِ حقیقی ایتدی ظاهر
گنه کار امّت اوسته بِاالتّفاخر
گیچوب اهل و عیال و باش و جاندان

یتوب امرِ شَهادت اِنتهایه
چکیلدی قاره عَرشِ کِبریایه
وُریلدی گون کیمی باشی جدایه
اوجالدی ناله عرشه اِنس و جاندان

باشی باشدان مقام ایتدی جِدانی
ایشق لاندیردی نوری کُن فَکانی
تاپوب قربِ وصالِ کِبریانی
نشان ویردی نشانِ بی نشاندان

همیشه یالوارور (طوری) خدایه
تضاخر ایلسون اهلِ عزایه
اونوندا التماسی وار دعایه
هامی اهلِ عزا و نوحه خواندان

• چهارشنبه
• 17
• شهریور
• 1400
• ساعت
• 14:15
• نوشته شده توسط
• یوسف اکبری